豬流感搞到全港幼稚園停課，賭王何鴻燊阿仔猷龍三歲嘅囡囡開嗣近日亦冇學返，所以成日投訴爸爸冇時間陪佢，為咗氹囡囡開心，猷龍惟有辛苦啲每日港、澳兩邊走，爭取時間陪屋企人。
話時話，猷龍呢個番書仔點識幫個女改個咁深嘅名呢？佢笑言：「個名係父母改嘅，我都係識睇唔識解，不過佢哋（賭王同二太藍瓊纓）改得就一定係好嘢！」
查字典睇過，原來個「嗣」字有承繼、子孫等意思，賭王將孫女改名開嗣，顧名思義就係希望猷龍幫何家開枝散葉，繁衍子嗣。賭王恨抱孫恨到出晒面，睇嚟猷龍除咗做生意外，仲要加把勁造人，為爸爸生番個男孫先得嘞！
