據了解，前日嘅飯局，李國寶全程客客氣氣，唯獨對搞雷曼運動嘅甘乃威就唔多留情，多次明讚暗寸，話甘威都算叻囉，一場雷曼風波，搞到佢周身唔得閒，又要應付金管局，又要應付銀行大班。而甘威就話之你，一邊食，一邊笑口騎騎，對呢位外號「三點不露」嘅同僚，似乎唔放在眼內。

黨友對甘威有微言

最過癮嘅係，觥籌交錯過後，當大家連甜品都歎完，起身告辭之際，甘威突襲李國寶，攞出一封請願信，抗議東亞銀行將鴨脷洲分行關閉，政黨請願，竟然直闖東亞中環總行頂樓，應該都算第一次。咁都未算，甘威絕到連相機都帶埋，一手遞畀黨友李永達，幫手拍低歷史一刻，作為日後向東亞銀行提出要求嘅呈堂證供，李國寶呢鋪都算畀甘威陰到正。

立法會成立委員會調查雷曼迷債事件之初，李國寶充當銀行嘅說客，向議會同僚落嘴頭，最後無功而還，鎩羽而歸，委員會暑假之後，就會請班銀行高層上立法會解畫，所以李國寶最近再次不停接觸政黨進行游說，點知呢次引狼入室，請客之餘仲要畀班白鴿老屈，簡直係賠了夫人又折兵，送客之後閂埋門唔知佢會唔會用錘仔揼心口呢？

甘威玩殘李國寶，大快人心，但聽講佢嘅黨友對甘威頗有微言，事關甘威將區議員嘅地區人士突襲式街頭請願手法帶入立法會，已經唔係第一次，以前白鴿黨財經事務及庫務局官員請食飯，甘威都有類似嘅突襲行動，搞到場面好尷尬。