曾蔭權尋日話喎，香港醫療水平好高，有條件發展醫療服務作為香港嘅重要產業。佢仲話推動私營醫療服務，唔單止唔會影響公營醫療服務水平，反而仲可以減輕公營醫療嘅負擔，令成個社會受惠。

香港醫療水平好高？唔好噏得就噏啦！有食物及衞生局局長周一嶽喺度，醫管局三日唔埋兩日就爆單醜聞出嚟，打錯針、輸錯血、割錯胸、過期藥、發霉藥……叮！好似《三字經》咁長背長有呀！香港醫療質素有幾高？唔使太一叮多講，大家心照啦！

叮佢個鎯鎯，喺周一嶽掌管之下，公共醫療系統資源嚴重錯配。醫管局淨係識肥上瘦下，高官個個行行企企等運到，之但係前線資源同埋人手長期不足，搞到公立醫院醫生做到踢晒腳，難怪醫療事故無日無之啦。

最離譜嘅係，周一嶽明知問題係幾咁嚴重，弊在一直闊佬懶理。佢老哥不但冇調整架構增撥資源，仲度咗條「藥物名冊」毒招出嚟，將一大批勁貴嘅常用藥物列為「非常規藥物」，要病人自己畀錢買藥！

記得喺「藥物名冊」啱啱推出嗰時，周一嶽曾經拍晒心口話，絕對唔會有「冇錢冇藥醫」嘅情況發生。但不出幾年，依家已經有大把事例可以證明，周一嶽絕對係擘大眼講大話！

嗱嗱嗱，早前旺角發生奪命車禍，有女途人畀小巴輾爆盆骨，送到入伊利沙伯醫院，院方竟然要家人先放低二萬蚊買特效止血藥。由呢件離晒譜嘅荒謬事件可以睇得出，唔好以為「先收錢，後救人」呢家嘢只得內地有，醫管局要幾麻木不仁有幾麻木不仁呀！

話時話，曾蔭權話推動私營醫療服務可以減輕公營醫療服務嘅負擔，又有佢嘅道理。舉個例吖，當局今年一月一日開始推行長者醫療券計劃，每年為七十歲或以上長者提供五張各值五十元醫療券，將長者醫療當係負擔掟咗畀私家醫生。

但據衞生署資料顯示，截至五月底，六十六萬個合資格長者中，不足一成半用過醫療券。鬼咩，成套電腦系統麻煩到嘔，好多醫生都退出唔玩，搞到長者有醫療券都冇地方用，有等於冇。之不過，就算咁好彩搵到收醫療券嘅診所，都唔好高興住，因住係政府出豉油長者出雞，用埋醫療券都貴過睇政府門診！

叮佢個鎯鎯，周一鑊唔好再喺度渾渾噩噩，害人害物，搞乜嘢高大空醫療產業吖？計太一叮話齋，香港醫療得兩樣嘢最叻，係乜？一個係「見錢得救」，另一個係「見死不救」囉。咁嘅醫療中心，呃細路咩！