中大尋日舉行第六十屆大會，頒授榮譽博士學位畀名作家白先勇、永隆銀行前任董事長伍步高同劍橋大學校長Alison F Richard，表彰佢哋喺促進文化、經濟同對中大發展嘅貢獻。
三位榮譽博士當中，最為香港人熟悉嘅就係白先勇，因為佢嘅《驀然回首》、《台北人》等作品，係中學生嘅指定讀物。尋日典禮一完，大家都爭住搵佢影相同攞簽名。白先勇話佢同中大嘅淵源好深，除咗二○○○年同中大出版《台北人》中英雙語版外，更連續三年擔任中大舉辦嘅青年文學獎評判，所以將來佢會繼續同中大合作，推動文化發展。
伍步高就話，伍家多年嚟捐好多錢畀中大，仲喺○七年捐巨款畀中大成立伍宜孫書院，主要係因為佢嘅細佬妹都喺中大畢業，所以對呢間學校特別有感情喎。
Richard教授雖然長年喺外國生活，但尋日致詞時都特別稱讚同多謝李嘉誠基金會多年嚟透過組成「東西方聯盟」，支持十所國際頂尖學府嘅醫學研究發展，令劍橋大學同中大都因此受惠。