早前都講過，政府要求立法會經濟發展事務委員會聽日開會，但討論嘅議程係乜就唔肯講，搞到委員會主席林健鋒硬食同僚波餅。一如所料，係商務及經濟發展局局長Rita劉吳惠蘭累佢嘅。
行政會議今朝會就迪士尼擴建計劃拍板，按照立法會嘅既定程序，如果政府想喺七月十號就迪士尼擴建向財委會攞錢，必須喺今個禮拜初將建議提交委員會「過冷河」，因此Rita一係要求財委會主席劉慧卿網開一面畀佢豁免有關通知期，一係就逼林健鋒喺行會拍板前預早安排開會，是但一個要做醜人。
商務局過去同卿姐有過唔少牙齒印，多次被指企圖繞過既定程序攞錢，雖然部分事件最後證實唔關Rita事，但相信佢點都唔想再辣㷫卿姐，惟有改向較好相與嘅林健鋒埋手。
其實政府喺行會拍板前要求立法會嘅委員會預早安排開會，過往亦時有發生，只要冇寫明係行會即將討論嘅項目，技術上就唔算洩露行會議程。可能Rita仲以為自己係公務員，做乜都寧緊莫鬆，先爆出要求議員討論「神秘議程」嘅笑話，就咁質咗林健鋒食死貓囉。