本文重點
田北辰今日卸任語常會主席。前排田二少就教學語言「微調」政策同教育局局長孫明揚隔空開火，記者仍然好關心佢同政府今次係咪不歡而散，田二少尋日同傳媒見面就話同孫公關係好好，但佢估計孫公喺「微調」事件可能心入面有少少唔舒服，自己都好同情佢喎！
程介明屆六十五歲
田二少話唔想畀人話厚顏無恥，所以一定要走；但轉頭又拋低一句，話自己已經五十九歲，應該讓啲機會畀啲四十幾歲嘅人。嘩！咁講擺明係寸繼任人六十五歲嘅程介明老過自己啫！
臨別秋波，佢仍不忘推銷母語教學，話母語教學本身係苦口良藥，明白唔係個個都支持，而且提升學生英語水平係政府高層意願，好似明白負責「微調」嘅孫公其實都有苦衷嘅。但講起「普通話教中文」，田二少就特別開心，因為調查發現，接受「普教中」嘅小三學生，普通話水平已好過一啲冇接受「普教中」嘅中三學生，「普教中」可以話係佢任內得意之作。