至今仍雲英未嫁嘅Mandy，喺書中用「第一春」同「許配」嚟形容自己喺○六年三月加盟當時啱啱創立嘅公文袋，點知兩個零月後，就爆出一位黨內嘅「專業高層」同幾位有意參選區議會嘅黨員，喺記者面前大數佢嘅不是，最後連執委會都要開會討論事件，期間佢仲開開吓會忍唔住喊住衝出會議室。

佢又披露曾經同佢競逐出選○八年會計界立法會選舉嘅一名女黨員，曾經做過佢「大熱對手」嘅選舉經理，喺游說佢放棄公文袋司庫職務同參選立法會不果後，就公然出席該名「大熱對手」嘅新書簽名會，擺明點都唔想佢選到。

雖然佢冇喺書入面指名道姓話呢兩個人係邊個，但大家只要翻查吓報紙剪報相信就一清二楚。

用直升機載民主阿婆拉票

Mandy最後仲點名狠批公文袋「形象高調，回應低調」、「不食民間煙火」、予人「藍血人」同「高高在上」嘅印象等，其中一個經典例子，就係喺立法會選舉投票日用直升機接載有「民主阿婆」之稱嘅陳方安生拉票。尤其令佢感受深嘅係，當佢喺○八年落選立法會後，唔少民主派舊同事都有約佢食飯，加以安慰同支持，反而自己個黨就好少人問候佢，令佢下定決心同呢位曾寄以厚望嘅「好歸宿」同「夫君」分手。呢啲就叫哀莫大於心死嘞。

其實香港政黨發展歷史尚淺，有人入錯黨或者中途變節退黨，本身唔係乜嘢新奇事，退黨後開記者會甚至出書數臭對方，亦時有所聞，奇就奇在點解要揀喺呢個時刻呢？睇嚟「君子交絕，不出惡聲」呢句說話，依家已唔再流行囉！