29/06/2009

播放本新聞相關短片

社工做到嘔 社署係禍首

太一叮向來好尊敬社工呢一行,事關社工素有「北斗星」美譽,佢哋係社會嘅苦海明燈,引領需要幫助嘅人走出困局,你話幾偉大吖。但係今時唔同往日咯,依家北斗星能醫不自醫,分分鐘自身難保呀!

有調查機構最近訪問咗三十三名社署保護家庭及兒童服務課嘅社工,發現好多社工做到嘔,每月平均超時工作三個工作天,有三成社工認為家庭生活嚴重受影響。

咁都唔止呀,沉重嘅工作壓力亦令到社工嘅健康受損。七成社工有失眠以及高血壓,最大劑嘅係,有百分之六社工仲話有過自殺念頭,有啲仲曾經試過自殺添。

以天水圍呢個悲情城市為例吖,唔係浪得虛名㗎,嗰度有全港十分之一綜援家庭,又發生過最多家庭倫常悲劇,耐唔耐有單掟子女落街嘅慘案發生。稍有良知嘅人睇到都心翳啦,可想而知負責跟進呢啲個案嘅社工壓力有幾大吖!

之不過,社會福利署署長余志穩就唔覺得係乜嘢一回事,反正佢都聽到麻木晒咯,所以佢話喺一個七百幾萬人嘅社會,好難完全防止悲劇發生,因為社署唔可以每一個個案都跟得咁貼咁話。

叮佢個鎯鎯,呢個世上睇怕除咗余志穩唔知之外,係人都知點解咁多個案都跟唔貼,原因簡單到極,咪就係社署資源分配亂七八糟,搞到社工做到踢晒腳囉。講到底,社署至係罪魁禍首!

唔講唔知,原來天水圍區內社工人手嚴重不足,一樣係冠絕全港㗎!據資料顯示,平均一名社工要服務一萬名居民。

叮佢個鎯鎯吖,十個茶壺九個蓋已經夠難搞啦,仲要一萬個茶壺先得一個蓋添,試問咁又點可以跟得貼呀?

事實上,曾經有學者踢爆天水圍區內嘅家庭服務中心,一個社工平均要處理九十宗個案。叮!就算社工個個係三頭六臂、千手觀音都搞唔掂啦!

最弊次次有空中飛人事件重演時,社區人士次次嗌到喉沙,呼籲政府增加資源,余志穩依舊裝模作樣話研究緊,又話已經提高警覺。不過,係人都知呢個政府冇樣叻,最叻就係吹水,講就天下無敵,做就有心無力。好嘞,做完騷之後又點吖?咪又係繼續拖得就拖,社工不足嘅問題依然未解決。

除咗家庭問題之外,家陣濫藥問題蔓延學校,少女援交風氣愈來愈嚴重。但當局打死唔肯增撥資源畀學校,一間有過千名學生嘅學校,都只係得一名駐校社工咁大把,叮!社工就算一日有四十八小時,不眠不休都輔導唔晒全校學生啦。

叮佢個鎯鎯,依家社會問題愈來愈嚴重,再係咁落去,鐵人都捱唔住,社工就算唔做到病都激到病。余志穩係咪唔見棺材唔流眼淚,係要搞到有社工頂唔順,做埋空中飛人至知驚吖?