退休高官揸起鑊鏟者大有人在，繼警隊前一哥李明逵開班教煮餸後，前經濟發展及勞工局局長葉澍堃亦拜師「阿一鮑魚」楊貫一學煮鮑魚。
阿一尋日出席一個活動，講起收前高官為徒，佢話葉澍堃煮餸有一手，絕對唔係玩玩吓，既然徒弟有心學，師傅都唔吝嗇，盡將烹調秘技一一傳授。
期待師徒齊齊獻技
阿一當年學煮鮑魚時都交過唔少學費，為求摸出竅門，更不惜工本買大批鮑魚練習，花費足夠買一層樓，如今輪到葉澍堃學嘢，唔知條鮑魚數會由邊個出呢？
聽聞葉澍堃煮鮑魚煮上癮，仲貪心到想學埋其他菜式，但就仲未就到時間上堂，但葉澍堃拍心口話，日後如果有慈善節目需要佢幫拖，佢好想拉埋師傅齊齊上陣，煮鮑魚獻技喎！