捉住馬會主席阿John陳祖澤，問吓申請增加五天賽事幾時「開綠燈」，佢話仲等緊政府拍板，時間表未定，但有信心爭取成功喎。喺總結今季個人投注成績時，佢笑言係交學費居多，未見贏大錢。

明年落莊去留未明

唔少馬迷以為阿John近水樓台，一定聽埋唔少必勝貼士，身邊嘅陳太就爆料話，老公緊守小注怡情原則，最叻嗰次都係贏過幾百蚊咋。

馬季煞科在即，阿John話暑期要抖一抖。唔經唔覺，佢坐咗主席寶座快將四年，按照慣例，做埋新馬季後明年就要「落莊」，阿John未有為去留問題露半點口風，但陳太就話老公退下火線一啲都唔奇，屆時可以陪佢多啲喎。