佢哋坐嘅郵輪叫Crystal Serenity（水晶尚寧號），被譽為全球最佳中型郵輪，船上享樂設施一流，但田少一上船，就留意到隻船本來坐到八百幾人，依家船上得五百人左右，即係唔夠七成客滿，冇往年咁擠迫，歐洲旅遊業睇怕仲未復甦喎。

咁歐洲大陸零售業又點呢？田少話歐洲本來七月五號至開始減價，但佢發現當地名店有偷步減價情況，佢入到名店對住件衫呻句價錢太貴，店員就會靜雞雞打個折頭畀佢。名店都有價講，市道可想而知。

田少問過歐洲嘅朋友，當地旅客跌成三、四成，相當恐怖，喺咁嘅大環境下，香港旅遊業好難獨善其身，加上豬流感爆發，至六月二十號，內地訪港旅客下跌一成三，佢更對香港旅遊業業績發預警，今年將會係香港近年最嚴峻嘅一年。