賭王大讚霍老一生貢獻國家

霍老講過：「冇我，所有澳門一切都係假嘅！」可見佢同澳門嘅淵源好深。○二年霍老退出澳門旅遊娛樂公司，將手上市值一百億元嘅兩成七澳娛股權捐出，成立澳門霍英東基金會，建設澳門。基金會三年前支持興建嘅鏡湖醫院霍英東博士專科醫療大樓尋日舉行落成儀式，澳門特首、同霍老相識半世紀嘅「賭王」同國家衞生部高層都有出席，反映霍家塊金漆招牌喺澳門仍然夠照。

澳門特區政府換屆在即，霍震霆表明霍家撐澳門嘅心不變，霍家唔會離開澳門，基金會日後繼續建設澳門醫療、教育同文化，秉承霍老多年來對澳門社會服務建設嘅精神同感情咁話。賭王就大讚呢位做艇家出身嘅老朋友，一生貢獻國家，堅持夢想，醫療大樓以霍老命名，猶如霍老企喺船尾手執船槳，默默推動澳門專科醫療服務向前行。

霍老一生有三寶，就係商業王國、體育事業同開發南沙夢，三寶都已有指定接班人，而佢喺澳門建立嘅社會服務事業，過往就比較少人提及，醫療大樓落成正好提醒大家。事關喺儀式中，霍公子同二房嘅文遜等幾位霍家二代成員亮相，但第三代就只有一個，就係啓山，令人眼前一亮。喺三個仔當中，霍公子只帶啓山去濠江同啲世叔伯打招呼，從中亦窺探霍家第三代開始分工。

一向低調嘅啓山今次喺霍家第三代中「脫穎而出」，跟住霍公子過濠江亮相，唔通啓山對澳門社會服務特別有興趣？