有立法會議員近日自發組織籃球隊，下禮拜六遠赴芝麻灣同正生學生鬥波，之後仲一齊燒烤，暫時有七名男議員報咗名，其中全立法會最高嘅劉秀成將擔任隊長，而身材同球技成反比嘅白鴿黨「鐵頭仁」何俊仁亦可能加入，但成隊球隊最奇怪嘅就係搵咗經濟動力嘅「蘇菲」梁劉柔芬做領隊。
蘇菲身高同鐵頭仁不相伯仲，好明顯唔係打開籃球，唯一同體育有聯繫嘅，就係佢老公梁孔德係足總主席，但唔係搞開籃球喎。
有議員就揣測，其實蘇菲好同情啲正生學生，但為免同身兼經濟動力顧問嘅新界鄉議局主席劉皇發唱對台，先至冇同其他議員一齊聯署撐正生，今次佢可能想做番啲嘢補鑊。實情係咪咁，只有佢自己最清楚。