有心人撐靈糧堂接辦

大輝有間林大輝中學，尋日佢搵埋校長吳奇壎及校董楊國榮同傳媒茶敍造勢，佢承諾林大輝慈善基金會豪擲一千萬元接辦黃乾亨校，比全新開辦一間小學所需嘅七百萬元多出近一半。佢又強調由○二年申辦中學時，已諗住要一條龍搞埋小學，絕對唔係一時間興起，依家唔少人形容黃乾亨校係爛尾樓，佢反而當係天作之合嘅寶物。

至於現時已有多間幼稚園、小學同中學嘅老牌辦學團體香港靈糧堂，Sell嘅唔單止係優質基督教教育，仲有一班星光燦爛嘅有心人力撐，包括立法會議員石禮謙、陳茂波、公職王陳智思，仲有前港姐張瑪莉等答應做校董，聽講有啲黃乾亨校學生嘅家長，都話好希望佢哋接辦添。