話說禮拜二香港各大社團公布七一巡遊活動，由棠哥主持記者會，透露今年巡遊嘅重頭戲，係破天荒請到禮賓府嘅人同四個局長到場行一小段路，但聽聞截至棠哥公布消息嘅一刻，特首辦同幾個局長從未回覆過主辦單位，因為政府仲要評估高調參加巡遊，會唔會刺激更多人參加下晝嘅遊行。棠哥事先張揚，講到打風都打唔甩，變相夾硬抬人上轎，焗人冇得拒絕啫。

禮賓府嘅人參加巡遊消息一出，據聞特首辦也為之愕然。特首辦尋日回覆查詢時，話會出席巡遊，亦會參與起步禮，而四個局長嘅新聞秘書就口徑一致，話會出席巡遊起步禮。

至於係咪參與巡遊，由於未知當日活動具體安排，無可奉告，有待磋商。四個局長嘅回覆說明乜嘢？棠哥先斬後奏囉！一日甩兩次轆，嗰日棠哥發生乜嘢事呀？