政府尋日公布現年五十九歲嘅建築署署長余熾鏗，將於下月五號起開始退休前休假，由副署長劉賴筱韞接任。本來由署內唯一一名副署長頂上，喺政府嚟講係正常不過嘅安排，但今次就引起非議。
原因唔係劉太唔夠班，而係佢現年已經五十八歲，由五十八歲接任五十九歲，升職做多年零、個位未坐暖就又要退休，就算佢點叻都好，都好難喺任內有乜大建樹，對部門發展絕對唔係一件好事，尤其政府好快又要搵人接班。
呢種情況亦有前科，好似外號「黑英」嘅天文台前台長林超英退休，新台長李本瀅亦係五十八歲。其實政府內部已有規定，唔會畀啲將於一年內退休嘅高官升職，以免影響部門運作，以及防範有人純粹為想整大舊退休金。李台長同劉太嘅個案原則上冇違規，但就畀人打擦邊球或趕尾班車嘅感覺。