豬流感病毒嘅攻擊力真係唔講得笑，自本港出現首例本土感染豬流感個案後，疫情一發不可收拾。話口未完，本港尋日又新增咗至少六十宗豬流感確診個案，加加埋埋，累積個案已經突破咗四百宗啦！

香港被豬流感大軍攻陷，邊個係罪魁禍首呢？仲有邊個吖，咪就係食物及衞生局局長周一嶽囉，唔係佢，又點會搞到防疫漏洞多過乜，豬流感仲唔長驅直入咩！

豬流感疫潮殺到埋身，當局至好似如夢初醒咁，尋日宣布因應豬流感疫情嚴重，幼稚園同埋小學會繼續停課，除咗已經有確診個案嘅中學停課外，考完試嘅中學亦可以開始放暑假。

叮佢個鎯鎯吖，家陣搞到病毒落地生根喺社區擴散，周一嶽就改口要「緩疫」，「控疫」都一鑊泡啦，仲講「緩疫」，真係信佢半成都死。有關當局做過乜嘢防備工作吖，既冇做好個人防疫嘅配套措施，又冇加強社區清潔，所謂緩疫根本係大隻講！

舉個例吖，社署話自豬流感傳入本港之後，已經派員喺日常巡查時，順手監察埋安老院嘅防疫措施，如果發現有不足之處，會立即發出勸喻或者警告。該署又話已經先後兩次喺今年五月同埋六月，分別向津助機構嘅服務單位發放特別津貼，以為咁就可以緩疫咩？

本報記者去過全港各區多間安老院舍睇過，發現唔理係政府資助抑或私人營辦嘅安老院舍，大部分嘅防疫措施都嚴重不足，掂行掂過行入去，裏面嘅職員冇要求探熱或者戴口罩，甚至行埋床位同院友有近距離接觸都得，如果一個唔好彩訪客有豬流感病毒，好易令到老人家中招。

仲有呀，社署話就話撥款資助院舍購買清潔以及消毒用品，最弊係唔理院舍規模大小，都係一次過發放三千元。對於小型院舍勉強可以幫到手，但對大型院舍嚟講，根本就止唔到咳，呢筆錢只係夠買一、兩個月口罩，試問又點可以加強防疫吖。

除咗老人院舍不設防，港府決定學校停課一樣係亂晒陣腳，完全冇諗過學生停課後嘅配套，搞到學生唔係逼晒去補習社、圖書館，就係去機舖、網吧打機，嗰度人頭湧湧，衞生情況隨時仲差過學校呀！

鬼咩，港府抗疫都係為做騷而做騷，吹吓水當係防疫，整色整水搞乜嘢「全城清潔運動」，又係得三分鐘熱度，做完騷之後，咪又係關人個關，大街小巷咪一樣堆滿垃圾，豬流感病毒happy到暈啦！

所以呢，小市民唔好再存有任何幻想，以為可以靠周一嶽抗疫。計太一叮話齋，佢唔引其他古靈精怪病毒入關害港人已經偷笑啦！講到尾，要擊潰豬流感大軍，不如自求多福，武裝自己身體好過啦！