有「光纖之父」稱號嘅中大前校長高錕患上老人癡呆症後，極少公開露面，但佢嘅中大同事就定期探佢。據講，高錕仍然Keep住游水健身，可惜記憶力逐漸衰退，隨身要帶備張紙寫上自己個名同地址，以防走失後唔識路返屋企。
前中大校長兼中大逸夫書院校董會主席馬臨，以及中大副校長楊綱凱，日前出席一個學術界頒獎禮，馬臨同楊綱凱都異口同聲話最近見過高錕，個幾禮拜前，馬臨更喺山光道馬會會所游水時撞見佢及佢太太，高太一眼就認得馬教授，但高錕就唔係好認得呢位舊友。
馬臨話，高錕嘅老人癡呆症係遺傳嘅，高父亦患有呢個病，所以佢有呢個病一啲都唔奇。睇見前拍檔受病魔困擾，馬臨都覺得心酸。楊綱凱就話，兩個月前同高錕食過飯，感覺佢好開心，唔覺得佢有老人癡呆症。