亞視執行主席張永霖（Linus）百足咁多爪，長期客串主持電台清談節目，佢嘅特色之一就係咬音吐字句句清晰，打開收音機，好容易認得出佢把聲，「鐘錶大王」孫秉樞尋日巧遇Linus時，即刻話自己成日聽佢嘅節目，係粉絲之一，但就覺得Linus「講得太慢」。
孫秉樞首先讚Linus嘅電台節目好好聽，但係隨即話鋒一轉：「不過你講得好慢，唔夠喉！」原來八十幾歲嘅孫秉樞覺得Linus講嘢太慢，聽得唔過癮。見慣大風大浪嘅Linus可能未試過粉絲咁直接畀意見，微微一笑咁話：「咁我會改善吓！」
講開佢嘅節目，之前都有唔少意見話Linus喺節目中，從來唔會稱呼自己做「我」，而係講「張永霖覺得」、「張永霖都試過」，聽眾聽嘅時候感覺好怪，Linus話都要改埋呢個問題。