本文重點
全國人大代表不時要組團考察國情，港區人大下個月都會組團考察山西，更因此鬧咗單政壇笑話。話說有「血煤之鄉」嘅山西省曾經歷多次礦難，省市領導都被撤換過，但港區人大就有人提出考察行程加入視察煤礦洞。佢哋想以身犯險係一回事，但山西官員同人大辦公廳就好堅決咁畀個檸檬佢哋食。
當去睇鐘乳洞咁簡單
港區人大下月中考察山西九日，早前開每月例會討論行程，聞說當場有唔止一位尊貴人大提出，山西礦難時有所聞，「不如今次就落煤礦洞下面睇吓啦」，令沉靜嘅會議變得鬧哄哄，港區人大更未出發、先興奮。
香港冇煤礦洞，港區人大可能以為安排參觀煤礦洞就好似去桂林睇鐘乳洞咁簡單，點知個建議對人大辦公廳官員簡直係驚嚇挑戰。山西礦難係特大意外，因此換過好幾個第一把手，咁敏感？唔好啦啩！據聞人大辦公廳已經回覆港區人大，婉拒要求。冇得考察煤礦洞嘅港區人大，今次算係上咗一堂國情課。