本文重點
富貴黨前副主席周梁淑怡淡出政壇後，最近榮升第二任外婆，佢嘅大女周智美年前誕下女兒，上禮拜五輪到二女周智琪做媽咪，凌晨時分剖腹誕下六磅半女嬰，BB一對大眼似足婆婆，莎姐見到孫女就嗒晒糖，索性將孫女嘅出生照擺上iPhone做手機Wallpaper，夠晒潮！
接生由胞妹操刀
莎姐前日現身太古（中國）主席陳南祿嘅新書簽名會，一嚟到就主動分享抱孫消息，莎姐一邊攞出手機照片「示威」，一邊大晒幸福，話孫女趕及喺父親節前出世，認真識揀時候。今次接生醫生係由莎姐胞妹、資深婦產科名醫梁淑德操刀，上次大女智美生BB時都係搵佢幫手，話晒梁醫生係城中名媛嘅「御醫」，林青霞生女都係搵佢，手勢毋庸置疑，今次幫自己人接生，當然加多兩錢愛心啦。
莎姐再度抱孫開心到笑唔停，話孫女遺傳咗媽咪同外婆嘅優良傳統，雙眼尤其大。不過，講到為孫女改乜名好，莎姐就話未諗到喎。