海洋公園董事局主席盛智文（扮嘢文）本月底任滿，按照政府嘅「六六規定」，一般唔可以再度連任。但有消息話，政府認為扮嘢文重振公園有功，又唔想喺擴建大計中易將，決定破例畀佢續任多三年，等佢可以繼續扮鬼扮馬玩到二○一二年，到時仲可以見證海洋公園擴建部分落成。
○三年七月上任嘅扮嘢文，帶領海洋公園應付沙士後嘅打擊，冇耐又輪到香港迪士尼嘅競爭，難怪佢形容當年嘅海洋公園好似一艘穿咗窿、正慢慢下沉嘅爛船，再唔大力改革就好難生存落去。
海洋公園今年適逢換人高峰期，扮嘢文月底任滿外，佢嘅副手海洋公園副主席韋智理同另外四名董事局成員，亦會喺月底夠鐘走人。