經濟機遇委員會由煲呔曾委任，日前召開第五次會議後，煲呔曾就宣布委員會第五次會議係最後一次會議，變相宣布委員會任滿，呢個宣布唔多唔少都令人感覺突然。據講，口水會八個月嚟雖然開咗五次會，但為香港經濟搵新方向嘅效果似乎麻麻，亦諗唔到乜嘢具指導方向嘅新橋，最新兩次會議雖然討論六大產業發展，但呢個建議亦係政府綜合成員意見、輿論同外界建議而成，所以兩次會議後都係由煲呔曾出嚟領功。

口水會組成以嚟就爭議多多，由於多個成員所屬嘅集團好似中原地產、滙豐銀行今年初爭相裁員，引嚟好多打工仔不滿，口水會淪為「裁員會」，公共形象更差，市民對個會嘅運作亦唔多關心。

委員投入 成效未見

縱使口水會中如中大校長劉遵義、畢馬威會計師事務所合夥人麥嘉軒、鷹達證券集團主席梁家齊等好投入都冇用，佢哋由舊年到今年初，先後幾次向委員會提交文件，建議發展香港成為區域金融中心、稅制改革等，各人嘅意見有冇被採納要遲啲至知，但至少都算口水會成員中比較勤力嘅幾個。

家吓無聲無息散檔，同當初獲委任時大鑼大鼓嘅宣傳，待遇真係差天共地，唔知煲呔曾一句感謝可唔可以驅散委員嘅心噏呢？