政府紀律部隊人員總工會尋日上街遊行，要求當局盡快落實去年十一月完成嘅紀律部隊職系架構檢討報告書嘅建議，增加職系嘅增薪點。

話時話，紀律部隊果然零舍唔同，一吹雞，遊行人士即刻由原先估計嘅四十多人幾何級數跳到二百名，雖然沿途冇嗌口號，佢哋高舉「議而不決、決而不行」橫額，夠晒諷刺。

呢個場面確係搞笑，成班高官成日叫小市民同舟共濟，點知有口話人，冇口話自己，連政府內部都團結唔到，仲搞到籠裏雞作反，真係羞家呀！

冇錯，香港法律保障市民有遊行集會嘅自由，紀律部隊除低套制服亦都係一介草民，問題係紀律部隊本身負責維持治安秩序，竟然搞到要着住黑衫向政府施壓，你話冇破壞社會穩定、打殘政府所餘無幾嘅管治權威？真係講都冇人信。

睇番今次參與遊行嘅紀律部隊分別有入境處、消防處、海關、懲教署及政府飛行服務隊，數來數去，係咪好似少咗個警隊呢？

哦，原來警務人員準備喺下星期日至遊行。呢次犀利咯，員佐級甚至警司級警務人員都行出嚟，佢哋嘅訴求同紀總有啲唔同，由於不滿薪酬趨勢調查報告其中兩間機構嘅數據，借勢要求盡快為警隊設立獨立薪酬架構。正所謂「不患寡而患不均」，如果警隊爭取到獨立薪酬架構，到時又會引起其他紀律部隊眼紅，原來靠嚇就得，咁就手尾長咯。

叮佢個鎯鎯，呢啲咪就係弱勢政府百事哀囉，一件芝麻綠豆咁小嘅事情，本來閂埋門唔啱講到啱，點知係都要製造矛盾紛爭，可見成個政府做嘢亂晒陣腳。

呢嗱，嗰個政制及內地事務局局長林瑞麟淨係識講廢話，話公務員應與社會共度時艱喎。

叮，家陣近二十萬人冇嘢做等運到，耐不耐仲有失業人士自殺添，有份工做已經要劏雞還神，呢班公務員仲大想頭到嫌錢少，獅子開大口要求逆市加薪，就知道共度時艱係得啖笑。鬼咩，一個二個捧住個鐵飯碗，又點會明白小市民生活喺水深火熱之中吖？

公務員事務局局長俞宗怡平時就翹埋手闊佬懶理，之但係一見成班紀律部隊人員唔係得把口，嚟真上街示威，即刻就腳仔軟，立即向紀律部隊工會放風降溫，承諾喺今年九月、十月向行政會議提交方案，落實紀常會職系架構檢討報告有關增薪點嘅建議，仲會考慮「追溯期」添。

唔該俞宗怡局長唔好再翹埋手唔做嘢，快啲拆掂佢啦，如果再咁落去，到時每個星期輪住嚟遊行，N咁多個政府部門，一年五十二個禮拜日又點夠分呀！