環保團體尋晚發起熄燈行動，咁啱晏晝沙田有賽事，馬會主席阿John陳祖澤話唔開燈仲好，可以同仔女點住蠟燭食飯慶祝父親節，夠晒浪漫。馬會大董Stephen葉澍堃則夠鬼馬，話預計返到屋企已經係夜晚十二點，啱啱夠鐘上床瞓覺，唔使開燈喎。
另一大董李國棟仲笑言熄燈後會開電筒照住自己，扮鬼嚇吓人，李太喺佢身邊聽到都哈哈大笑。究竟有幾多誠意慳電，睇嚟要佢哋自己至知嘞。
同場仲見到浸大校董會主席王英偉，佢自爆夜晚約咗兩位公子共度父親節，仲話大仔喺美國修畢藝術，計劃返港發展，細仔就喺大學讀經濟。咁啱西九行政總監個位懸空，何不叫公子試吓？佢笑騎騎咁話：「總監喎！邊有本事？你講笑咩！」
