22/06/2009

播放本新聞相關短片

政情:大舊石禮讓卿姐免費歐遊

立法會轄下嘅議會聯絡小組計劃喺暑假組團出訪東歐三國十一日,考察當地嘅民主改革進度同議會制度,每名議員團費估計最少要五、六萬銀。為免六十名議員因財失義爭崩頭,內會早前通過以比例代表制嘅方式,按各黨派同獨立議員嘅人數比例,瓜分八個由公帑資助嘅免費歐遊名額。

根據有關分配方法,聯絡小組嘅正副主席,即專業會議嘅「大舊石」石禮謙同白鴿黨嘅劉慧卿,其中一個可免費報團,另一個想跟埋去嘅話,一係自掏腰包畀團費,一係就同自己嘅黨友爭奪餘下嘅免費名額。由於大舊石同卿姐嘅黨友亦有意報團,咁即係又要爭啦!

最後身家相對豐厚嘅大舊石做咗禮讓大使,改以自費方式報團,讓咗個免費名額畀卿姐,令大家可以和氣收場,避過爭位風波。