為免大學畢業生喺嚟緊嘅暑假湧入勞動市場，進一步推高失業率，政府早前推出被謔稱為「奴工計劃」嘅大學生實習計劃，用每月四千蚊人工聘請啲畢業生做實習，令佢哋喺統計學上唔會被當做失業。然而，計劃未開始就問題多兼反效果多，前日有批副學士學生搞咗個「失業禮」，炮轟實習計劃搶走晒原本屬於佢哋嘅飯碗，令佢哋畢業即失業。
喺九五至二○○○年出任教育統籌局局長嘅王永平，尋日主持電視清談節目時，就踢爆佢當年推出嘅展翅同青少年就業見習計劃，亦係由政府資助二千蚊，資助啲企業用四千蚊請啲搵唔到工嘅中學生，同依家嘅大學生實習計劃好似倒模咁。
煲呔曾今時今日照抄十年前嘅做法，條數計起上嚟比當年刻薄好多，當年中三畢業都搵到四千蚊，家吓津貼嘅對象係大學畢業生，比中三嘅讀多七年書，又係搵四千，唔怪得十年前政府推出展翅同青見計劃時，批評嘅意見唔多，今次畀大學生嘅實習計劃就劣評如潮啦！