民望低沉冇有怕

第一式係耍太極。民望反映施政成效，孫公民望多年偏低，近兩次民調甚至跌穿合格線，對上一次評分得四十九點六分，但佢話一啲都唔緊張，皆因民望低係九七回歸時搞政制種落嘅因喎。佢話當年中英雙方未有共識，好多時佢唔可以表態，追問十次都講同樣說話，咪畀人感覺佢拖泥帶水、模棱兩可、冇自己立場、帶人遊花園……呢個印象久而久之就留喺市民心中。

之後佢接手天星碼頭遷拆，佢呻話：「政府當時諮詢係未夠深入，所以出嚟結果唔好，點點滴滴加埋就畀人咁嘅印象。」哦！原來民望差關時勢、諮詢事，但就唔關佢做成點嘅事，呢吓四両撥千斤，可謂為官第一課。

自嘲好彩記性差

第二式係選擇性失憶。 孫公深明從政路上彈多過讚，自嘲好彩記性差，佢笑言：「有人對我唔住，我第一日都仲記得，第二日只記得有件對我唔住嘅事，但對方係邊個就唔記得，到第三日件事係乜都唔記得。所以我冇隔晚愁，睇得好開。」但佢就要強記「六二四」嘞，點解？事關嗰日係結婚紀念日，唔記得搞出嚴重家庭糾紛好大鑊。

第三式係識走位，又或者處變不驚。孫公話一入政府就喺前新界民政署、徙置事務處同環境科主力搞沙田新市鎮項目，當中涉及填海，影響漁業，當年佢試過坐水警船出海同漁民談判，點知雙方傾唔掂數，佢見勢色唔對即時叫人開船走，班漁民竟然從後追趕，佢話：「好彩我快一步上岸，有警方接應。」最近爆出正生事件，孫公一直匿埋等保安局處理，原來佢咁識走位係喺多年前訓練出嚟嘅！