葵涌公眾泳池隔籬本來有六個壁球場，近年玩氣槍嘅發燒友愈來愈多，當局話要推廣本港嘅氣槍射擊活動，將呢啲場地畀非牟利團體改裝做射擊中心。聽落就巴閉囉，上下兩個靶場加埋有二十條靶道，全場使用電動標靶。開咗之後，睇怕班發燒友唔使再偷偷上山「打野戰」嘞啩？

咪咁開心住，雖然射擊中心舊年九月已經完成改建，十二月仲攞埋警務處發嘅營運牌照添，但到依家都未全面開放，只能夠為少數人提供射擊課程。原來佢哋仲未買到公眾責任保險，冇辦法開放。

叮！咁就怪嘞，康文署一次過同承辦團體簽咗七年租約，中心起好大半年，每個月場地使用時間只得一百一十一個鐘，唔到一般體育中心使用時間嘅四分一。批出咁長時間嘅租約，署方究竟有冇諗過承辦團體買唔到保險呢啲可能出現嘅情況㗎？依家壁球迷冇場地練波，射擊發燒友又冇得玩槍戰，兩頭唔到岸，好明顯係康文署監管失職，變相浪費公帑啦。

更加奇怪嘅係，本報記者向康文署問起呢單嘢，居然發現「重大突破」，署方回應話，承辦團體購買保險嘅程序已「大致完成」，中心好快就開得。一時龜速，一時神速，尋日話未掂，今日有傳媒關注，又變咗「就快掂」，到底搞邊科？唔該署長周達明出嚟解釋清楚。

不過，就算周署長行出嚟，至多係打打官腔，帶市民遊花園啫。查實康文署使公帑一向都係冇晒譜嘅啦，唔應使嘅亂Fing，應使嘅就唔使。嗱，有市民曾經投訴天水圍樂湖花園燈光唔夠，呢個蚊型公園今年五月翻新後重開，居然又變咗燈多過人，足足有八十盞咁多，而且未天黑就開晒燈。唔止係燒銀紙，仲製造光污染添。

仲有，最近將軍澳游泳池發生淺水池細路仔遇溺事件，嗰個十歲男童最終都救唔番。如果事發嗰陣現場有足夠嘅救生員，呢宗慘劇本來可以避免。康文署為咗慳皮，公眾泳池救生員人手長期不足都唔採取措施改善。北美同英國嘅泳池一般都會有四到六名救生員，而香港就只得兩個，有時甚至一個人睇兩個池，唔出事至奇啦。

叮佢個鎯鎯！康文署冇樣叻，至醒就係嘥公帑幫自己慳工夫兼卸膊。政府租地畀社會企業一般係三年，佢哋個射擊中心一租就租七年。有立法會議員話要康文署交代，嘥氣啦。其實一字咁淺，卸得就卸係康文署一貫作風，咪話七年吖，租夠七十年仲好，自己翹埋雙手，齋人工乜都唔使做，直頭爽到痹啦。