究竟幾時會就檢討空氣質素指標報告做公眾諮詢？啲議員打爛沙盆問到篤咁追問會唔會喺七月開始，但潘潔淨係話未來幾個月啦！有女議員仲發爛渣，左一句：咁大個政策局，點會今日唔知聽日事；右一句：如果連目標完成日期都冇，換個政治問責官員算啦！

連小組委員會主席都忍唔住話潘博士連個日期都唔肯講唔係好公道，但潘潔仍然軟皮蛇咁，答嚟答去都只係話「我哋嘅目標係盡快」。

眼見對潘潔冇晒辦法，有女議員嬲爆爆咁向主席提議喺今日開內務委員會時，向內會主席反映官員連個咁簡單嘅資料都唔肯講，小組委員會主席亦覺得呢個係態度問題，唔鍾意官員懶神秘、懶機密嘅態度，會喺今日口頭向內會主席反映。