本報獨家報道中環擦鞋匠李伯被食環署驅趕後十日,公文袋余若薇去信食物及衞生局局長周一鑊,要求食環署酌情發牌畀李伯擺檔,結果石沉大海,同時佢又收到中環戲院里幾位擺檔多年嘅擦鞋匠求助,於是佢發起尋日去戲院里幫襯擦鞋匠,並促請政府盡速發牌。
由報道刊出至發起到戲院里擦鞋,時間接近一個月,期間冇其他政黨過問事件,但直至本周二,白鴿黨甘乃威踩落戲院里擦鞋,仲即場透露食衞局副局長梁卓偉同意考慮發牌畀幾個擦鞋匠。當然甘威否認遲來先上岸截胡邀功啦,仲自稱十年前已處理過擦鞋匠問題。公文袋先去信,但當局竟先回覆甘威,唔係截胡又係乜呢?
再講,「經濟動力」早幾日開張,成員梁君彥亦自稱本周一已收到食衞局政治助理陳智遠嘅發牌通知,只係佢不屑去擦鞋做騷啫。
正所謂瘦田無人耕,耕開有人爭。政黨爭住為擦鞋匠出頭,係咪真係攞個心出嚟,只有佢哋自己知道。