關注青少年濫藥問題

日前政府又吹出畀正生喺梅窩試行三年嘅建議，睇吓有冇轉機，而平日同政府撐到行嘅泛民主派竟然變晒保皇黨，仲搞聯署撐政府，無非都係政治考慮，將佢哋嘅競爭對手、冇聯署嘅建仔同工聯會逼埋牆角，乘機猛鬧佢哋為選票。

泛民得二十三票，加埋個別獨立議員同埋富貴黨都未過半數，但隨着「五散人」同專業會議個別議員簽咗，聯署人數增至三十二個，即係過咗半數。縱觀議事廳咁多個政團，獨缺經濟動力。

正生係幫啲青年人戒毒，而當日經濟動力未正名前，3L林鍵鋒、梁君彥同「蘇菲」梁劉柔芬已經第一個撲出嚟，聯署關注青少年濫藥問題，冇理由唔撐正生喎！原來聽聞係有苦衷㗎。

據聞，蘇菲好關注青少年問題，尤其係濫藥，本來佢都想參加聯署，但正正因為發叔喺鄉議局搞咗個小組，又幫正生搵其他地方落戶，若果聯署嘅話，有咗既定立場，咁就等如落發叔面，所以蘇菲都㩒住自己。

好不容易先拉攏到發叔畀面做顧問，若果簽咗名就令發叔好尷尬，實畀人話經濟動力唔團結，內訌啦，所以情願冒住畀泛民鬧佢哋同建仔、工聯會同類，寧願捱鬧都唔想咁早表態，箍死自己。

勢估唔到，經濟動力一開波，咪話大展拳腳，連手腳都未伸出嚟，首當其衝就要面對團結嘅考驗，睇怕呢啲考驗日後陸續有嚟，但正生呢仗點拆招，咁就要睇吓佢哋嘅政治智慧嘞！