領匯尋日公布全年業績，收入多咗百分之七點二，有成四十五億，可分派收入高達十八億，升咗一成三。家陣環境咁惡劣，行行啲老細都喊咁口，領匯一枝獨秀，唔使蝕不特止，直頭賺到豬籠入水。班員工睇怕都可以掹吓車邊，就算冇人工加，都唔使減嘞啩？

咁諗就真係天真咯，須知呢個老細叫領匯，出晒名見錢眼開，為咗錢乜都做得出。呢嗱，佢哋呢頭數緊錢，嗰頭就開始諗縮數。由下個月開始，領匯就會實施新嘅管理合約，令到外判商要大規模裁員，涉及一百四十幾個商場同過百個停車場，估計有成千員工畀人打爛飯碗。

外面風大雨大，畀人叮走固然係慘，不過有得留低亦唔等於有飽飯食噃。領匯更改外判招標條件，保安員編制由一日三更變咗兩更，每日要做多一半時間，工時由八個鐘增加到十二個鐘。話就話月薪多咗千幾蚊，但計落嚟時薪仲少咗兩成，由二十八蚊減到二十三蚊。員工變相減薪，擺到明搵笨啦。

尋日有工會組織趁領匯公布業績發起遊行，抗議佢哋減薪裁員。領匯主席蘇兆明話，停車場業務已經外判，暫時唔會插手。

叮！領匯賺大錢，唔去諗吓喺經濟逆境同豬流感疫情衝擊下點樣改善服務，反而任由管理公司趁火打劫亂咁嚟，減薪、裁員、加工時，三樣嘢一次過做晒。當初停車場份合約寫明要保障員工待遇，薪酬唔會低過市場水平，以確保服務質素，依家又反轉豬肚，請問主席大人，領匯係咪無良啲吖？

自從領匯接管房委會轄下大部分停車場之後，租就搏命加，但設施改善慳得就慳，服務減得就減。好似沙田咁，由於領匯停車場嘅防盜設施唔足夠，舊年發生嘅車內盜竊案居然比前年多咗兩成六，比私人物業停車場嘅數字高出接近兩成。

叮！咁嘅服務質素，擺到明唔合格啦。但係政府一直都以「尊重商業運作」做理由，有親事就關人個關。

政府幾年前將大部分屋邨商場、街市及停車場嘅資產賣畀領匯，之後就名正言順卸得就卸，任得領匯貪得無厭，殺雞取卵，瘋狂加租，睇住小商戶同屋邨居民任人魚肉都唔出聲。自己失職嘅惡果要市民硬啃，政府同領匯一樣咁無良。

仲有，既然領匯肥過肥仔，好應該同市民分甘同味，將轄下商場減租吖？蘇兆明尋日被問到會唔會減租嗰陣，居然扮啞仔唔正面回應。佢自己都識講，轄下商場主要提供市民基本生活所需，依家經濟差成咁，舖頭拍晒烏蠅，叫你減租就咿咿哦哦，唔通仲諗住落井下石，將居民同商戶榨乾榨淨？叮！