「新界王」劉皇發太座吳妹姝炮製嘅酸子薑早喺政商界街知巷聞，每年初夏，佢例必整番一百幾十樽，唔止派街坊，仲派到去中環嘅立法會同政府總部，就連發展局局長林鄭月娥都食過翻尋味，追問發嬸幾時有子薑食。
發嬸應「粉絲」要求加料秘製二百樽子薑，尋日發叔嘅司機用立法會嘅手推車，將成百樽子薑運送到立法會大樓，發嬸人唔到但薑到，但佢提醒議員返到屋企後，要將子薑最少放喺雪櫃雪番兩日至食，味道會更正，而且保存一年都唔會變壞。
整薑難唔倒發嬸，反而搵樽就考起佢，原來近年內地流行轉用膠樽，玻璃樽變得極渴市，為咗儲起玻璃樽，發嬸平時飲完咖啡亦會叫工人留起個樽備用，所以今年有幸收到「發嬸牌」子薑嘅人，記得要回樽畀發嬸，咁就確保明年一定有薑食，又夠晒環保。