尋日晏晝一點幾，馬會主席阿John陳祖澤一個人行經立法會門外，表情若有所思，傾談之下，原來係因為尋日禮拜三罕有咁冇夜馬跑，令佢冇得入馬場，鬼咁唔習慣。又難怪嘅，賽馬係阿John嘅事業，亦係最大嗜好，佢都係嗰句，話好希望政府盡快拍板加多五日賽馬日，咁就皆大歡喜嘞。
新馬季至亮相
阿John近日添咗「新寵」，就係一隻由外國運嚟香港嘅馬嘞，身價幾高有待揭盅，但「新寵」暫時未可以亮相住，皆因接受緊防疫檢查，連馬主都唔探得。佢話會耐心等兩個禮拜，坐完「防疫監」就可以近距離摸吓「新寵」。
改乜名好？佢話暫時未諗到。計吓數，檢疫完都將近馬季水尾，想知佢「新寵」有幾醒，睇怕要等到新馬季。
