話說立法會「五散人」逢禮拜三都會坐埋一齊食早餐，交流議會事務嘅意見，尋日保險界陳健波突然收到怪醫嘅電話短訊，話患咗感冒嚟唔到，搞到一向注重衞生嘅陳健波籮籮攣，佢同記者呻話唔知怪醫係咪有豬流感，驚住「五散人」被集體隔離。陳健波為人果然好保險喎！

陳健波嘅憂慮不無道理，早前怪醫患過感冒，依家又中招，下晝照戴住口罩返立法會，見佢又流眼水又發燒，豬流感嘅病徵有晒，但發言時就除低口罩，任由病菌散播，簡直喺度播毒，搵其他五十九個同僚條命仔較飛。

醫學界代表做壞榜樣

問佢有冇做豬流感測試，佢反問「有癮咩？」又話如果中咗招，體內已經有抗體啦，唔使打針，亦冇睇醫生，佢仲翹起雙手好寸咁話：「我照鏡時咪睇緊醫生囉！」

作為醫學界代表，應該為防疫樹立榜樣，怪醫帶頭輕視豬流感，似乎唔多啱喎！正所謂針唔拮到肉唔知痛，依家有護士中招，怪醫更加應該執得緊啲啦！