特區官場論資排輩，譚志源脫離政務官行列前，係民政事務局副秘書長，點秤始終係新進一名，如果佢有幸紮職，除可理解為佢仕途三級跳，亦可視為特首辦主任一職自動降格，唔知煲呔曾點諗呢？

但消息話林公公仍未斷纜，但呢個調動牽涉嘅考慮好多，除要搵人頂佢個位，仲要中央任命，而政改諮詢年底出台，臨陣易將亦係重要考慮因素。消息稱，如果林公公真係「轉型」，騰出嘅局長位好有可能會由譚志源頂上，即係佢點都有職升。

尋日向林公公求證係咪就快過檔特首辦，佢話冇人搵過佢。呢頭驚動咗林公公，嗰頭立法會失驚無神有人主動報料，話商務及經濟發展局常秘蔡瑩璧會做呢個位，仲話政府好快有公布，雖則蔡瑩璧斷然否認紮職傳聞，但究竟係咪有人擾亂視聽呢？