工聯會近年收咗唔少白領會員，仲積極拓展專業界別，不斷成立新屬會，俗稱「金銀財寶」嘅金融、銀行、財務策劃同保險四個屬會，已經合共招攬咗七千幾個新會員，雖然相對工聯會嘅三十二萬會眾，呢個數目唔算多，但工聯會嘅雄心有目共睹。

工聯會密密做嘢，早前搞完銀行業後，又有新搞作，新屬會「香港會計業總工會」尋日開壇，會計界多年嚟都係親中陣營同民主派搶奪嘅目標，泛民喺上屆立法會選舉攻破防線，出現零的突破。

香港會計業總工會會長陳興生話，三個月內招收咗一百名會員，九成都係香港會計師公會嘅會員，喺立法會選舉同選舉委員會都有投票權。雖然香港會計業總工會依家仲係細會，但工聯會一向吸引會員有方，難保第日唔會變成選舉票倉之一。工聯會會長鄭耀棠仲氹到立法會會計界議員「波波」陳茂波落疊，一齊擔任榮譽會長，棠哥真係好識計數。

得失大老闆後果嚴重

政治冇免費午餐，波波埋工會堆，梗係想要選票啦！但唔知波波有冇計算埋機會成本呢？香港近年工運政治化，加上金融海嘯未退，勞僱關係緊張，萬一會計界爆發勞資糾紛，到時波波企喺邊一邊先？做得榮譽會長就要幫打工仔，但得失大老闆，喺功能組別選舉嘅損失可能仲大喎！

波波夾喺中間，順得哥情失嫂意，到時就知入錯三煞位囉。睇嚟佢都要做定危機處理，事先度定應對策略好喎，唔係實被啱啱退出公文袋嘅譚香文有機可乘啫，到時就恨錯難返囉。