08/06/2009

播放本新聞相關短片

侵權竊賊有照顧 創意之都冇運行

政府近排整色整水成立咗個「創意香港辦公室」,巴巴閉閉敲鑼打鼓要打造一個創意之都,係真唔係呀?叮,除非閣下已經做足心理準備,創作預咗畀人盜用,或者有大把錢打官司,否則,大家千祈唔好上當呀!

呢嗱,東方報業集團前記者高潤添○五年採訪一單市民食咗有毒帶子不適送院嘅新聞,其中一張第二日刊登喺《東方日報》頭版嘅獨家照片,竟然被《蘋果日報》、《成報》、《星島日報》、《東周刊》等多間傳媒機構盜用。光天化日公然偷嘢,仲成世界嘅!

東方保護知識產權,於是自費過百萬元律師費向涉案嘅傳媒機構以及擅自外洩照片嘅記者索償。呢劑鐵證如山,包括《蘋果日報》在內嘅有關傳媒,一早向東方賠償求和,而涉案記者高潤添亦喺上個星期被法庭裁定敗訴。之不過咁,事隔四年嘞,警方、海關同埋廉署完全冇執法行動。

據「東方報業民意調查」顯示,三成九受訪者認為香港現時嘅侵權行為嚴重;兩成九更感到非常嚴重;兩成二認為少少嚴重。

對於東方要花過百萬打官司,事件擾攘咗四年先至靠自己討回「最終的公道」,三成三受訪者認為,訴訟費昂貴,令到升斗市民唔敢打官司;兩成九唔滿意《版權條例》保障唔到受害人;兩成八直斥政府保護知識產權係「講一套做一套」。

東方就話擇善固執堅持透過法律途徑討回公道,但民事訴訟要使好多錢,唔係一般小市民可以負擔得起,好多被侵權嘅市民有冤無路訴。

本身係香港知識產權會董事嘅香港設計師協會前主席葉智榮都覺得好無奈,佢話香港侵權行為非常嚴重,已經令到創意工業停咗落嚟。包括佢在內,好多設計師已經放棄民事申訴。你話吖,呢個世界仲有公義嘅?

講起公義,太一叮愈嚟愈唔相信有,如果唔係,東方已就獨家照片被盜用向警方、海關同埋廉署舉報咗超過四年,但咁多年嚟,因乜事冇一個部門採取起訴行動?

立法會議員王國興講得啱,佢話:「當局唔執法等於縱容罪行發生、宣示罪行合法性。」

三成一受訪者話執法部門效率低,難以打擊侵權行為;兩成七指部門失職,冇依法處理;兩成六質疑當局四年仍未投入資源調查,係選擇性執法。

事實上,東方以及其網站嘅圖文被其他傳媒抄襲同埋盜用,幾乎無日無之。有兩成九受訪者歸咎懲罰以及量刑太輕,冇乜阻嚇力;兩成八就直斥係當局執法不力所造成嘅惡果;兩成六認為,反映侵權風氣好嚴重。

最離譜嘅一宗畸士,係爛果報擅自盜用王菲懷孕搭飛機獨家照嗰單。東方明明勝訴,法官居然判東方要幫敗訴嘅壹淫媒埋單畀堂費,最後東方要上訴至終審法院先至討回公道。

叮佢個鎯鎯,睇勻全世界,睇怕搵唔到有邊度可以咁照顧侵犯版權嘅賊。計太一叮話齋,六大優勢產業不切實際、四大經濟支柱又危危乎,反正侵權金腰帶,創意冇運行,倒不如呼籲七百萬人一條心,將香港打造成「侵權港」吖,笨!

直擊人類豬流感最新疫情
詳情瀏覽on.cc《奪命流感》