金融海嘯之後，股市、樓市近期出現罕見嘅升市，好多小投資者都急急入市，觀塘區議會主席陳振彬（Bunny）尋日就語重心長咁勸大家咪心急買樓，因為各國政府喺金融海嘯後狂掟錢救市，市場一下子多咗好多錢，水多得滯就會引發通貨膨脹，佢預測明年中，美國加息嘅機會好大，如果買樓唔夠小心，遲吓供樓就面對好大壓力。
Bunny尋日出席家庭議會舉辦嘅親子活動，講起同家人相處時，佢嘅秘訣原來係每朝堅持六點半起身同兩個囝囝邊食早餐邊傾偈，閒來帶佢哋行山、游水。
其實，Bunny近排好好運，愛駒「傳奇快車」日前爆冷贏出捧走百二萬獎金，認真恨死隔籬！以為Bunny會用筆錢環遊世界啦，點知佢慳住使，攞少少錢出嚟請家人同當日有份幫佢揀呢匹馬嘅「伯樂」食飯外，餘數全部撥捐母親名下嘅慈善基金做善事。