昂坪360少帥張少華（Morris）下個月就要調番娘家，出任港鐵車務營運總監，佢尋日出席一個電台節目時，講到自己獲委領軍「三碌拎」，可能同多事嘅性格有關。調職在即嘅佢依然創意無限，話「三碌拎」可以構思倣效時下好興嘅「女僕餐廳」，出「女僕車」，吸引更多旅客乘坐呢啲服務貼心嘅僕人車，不過佢轉過頭就話只係吹水。
Morris喺港鐵二十六年，佢話自己成日不務正業，做車輛經理本來只是顧維修，但佢○五年開始有六、七成時間都飛咗去英國、瑞典同公司傾營運合約，又幫公司諗點樣搵錢。
佢話自己係一個複雜嘅工程師，隔幾年就主動提調職，唔會被框框條條所困。快將調職嘅佢又話，「三碌拎」仲有大把發展潛力，譬如「女僕車」，可以擺個靚嚮導喺車廂，當個客係主人咁介紹沿途風光。出得女僕車，男僕車又會應運而生啫，咁樣落去，真係乜嘢乘客都吸引晒啦！
點知Morris講到興起時忽然改口為吹吓水。其實條橋對貪新鮮嘅香港人同旅客都有賣點，佢或者係因為不在其位不謀其事！