榮升做馬會遴選委員嘅莎莎老闆郭少明，尋日同太太現身沙田馬場消遣，郭太以一身繡花牛仔衫褲Look再孭個名牌手袋，既活力又有夏日色彩，不過，馬會職員認為佢衣着唔合適，唔畀佢落沙圈，令郭太一度幾冇癮。

郭太被阻入沙圈後，一度喺入口處唔上唔落，其實郭太係馬場常客，冇理由唔知規矩㗎！佢解釋話，本來唔諗住落沙圈，突然醒起留低咗嘢，所以想落去攞番。佢冇落過沙圈，點會漏低嘢㗎？

同樣喺馬會出現嘅仲有大董范徐麗泰，佢履行大董職責，尋日又請朋友食飯。