青少年濫藥問題敲響警鐘，多個政黨都未見迅速反應，3L成員尋日就發表一份聯署聲明，大講近日嘅濫藥事件。三個代表工商界嘅議員有此舉動，畀人好多想像空間：唔通三個人由年頭一路吹風嘅聯合辦公室好快開張？
佢哋三人嘅聲明頭炮就講到近日爆出有學生濫藥嘅伯裘書院，當中梁劉柔芬話對伯裘書院校長譚萬鈞話一千零七十九名學生中只有七人有濫藥及不良習慣、情況並不嚴重嘅講法，感到好遺憾，因為「一個吸毒已嫌太多」。
今次署名嘅先後次序為林健鋒、梁君彥同梁劉柔芬，根據林健鋒嘅解釋，今次排位係跟英文字母順序排列，「林」（Lam）較「梁」（Leung）排得前，而梁君彥嘅英文名係Andrew，梁劉柔芬則叫Sophie，所以Andrew亦排先過Sophie。