鬍鬚曾喺彼邦發言後，有電子傳媒引述佢嘅話，佢話九八年金融風暴時，頭六個月唔見咗四萬幾個職位，而今次金融海嘯只係流失咗三萬幾個，證明港府嘅「重民」措施有效；換言之，本港失業率上到四十一個月嚟新高嘅百分之五點三，佢都覺得政府措施有效，好似香港人應該多謝佢英明神武咁。

佢仲話，○八年到依家，港府派糖累積使咗七百幾億元，佔香港本地生產總值嘅百分之五點二，今年應該足夠咁話，好似話畀市民知，下半年唔使旨意佢再派糖嘞。鬍鬚曾上月派糖時，明明開咗一張空頭支頭，話視乎經濟同失業情況，港府仲可能有下一輪派糖措施，甚至不斷加碼，言猶在耳，咁快已經出彈弓手，收番派糖承諾。不過，呢番話佢走到去外國先敢講，相信都係怕被升斗市民狙擊。