Mandy尋日喺西九龍一間酒店見記者，講到離黨原因時，佢自言好重視地區工作，但黨喺呢方面嘅支援不足；佢跟住話中有話道，本港有老牌政黨以前都唔重視落選議員嘅地區工作，但呢幾年從錯誤中學習，積極為落選議員備戰，反而新政黨就冇呢個觸覺，對落選議員照顧不足。佢冇點名新舊分別指乜，但就打算喺聽日慶祝五十二歲生日時重新出發，揮慧劍斬斷同公文袋維持咗差唔多三年嘅關係。

書展出自傳爆秘聞

佢形容自己同公文袋步伐不一，過去雖有反映，但聲音唔被重視，佢仲舉例話：「我行得快，但人哋唔覺得行慢啲有咩問題，咁點呢？」溝通冇用之下，佢卒之明白「無謂浪費青春」。被問到咁樣係咪因了解而分手？Mandy都忍唔住話：「咁大家啱啱一齊時肯定係有理想、有願景㗎啦。」

退黨後，佢密鑼緊鼓寫自傳，準備書展出書，仲會搵公文袋朋友寫序，大爆「政黨的內外角力以及罕為人知的人脈關係」。公文袋尋日發新聞稿對Mandy退黨深感惋惜同遺憾，睇嚟公文袋遲吓仲要面對新書嘅炸彈。