嗱，又多一單喇！有位八十三歲老翁尋日喺維園晨運嗰陣懷疑心臟病發，街坊報警求助。救護員到場幫阿伯急救之後，將佢抬上白車送院，點知架車撻極都唔着，惟有通知總台另外派車增援，就咁延誤咗十二分鐘，阿伯終於救唔番。死者家屬大鬧：「政府咁都得？都唔係第一次喇！」

其實，呢次係近期第二單同類事件嘞。三月底，石硤尾白田邨一名四十歲男子懷疑心臟病發，由車齡超過十年嘅白車送去醫院，途中發生故障，要由另一架車轉載，延誤八分鐘，又係救唔番。咁啱，尋日出事嘅白車又係車齡十年以上，上周五啱啱做完維修保養。呢啲老爺白車，真係害得人多咯。

叮！雖然呢次死者家屬寬宏大量，話唔會追究事件，但白車嚴重老化，救命變攞命，就算人哋唔追究，消防處處長盧振雄都應該感到汗顏喇。較早前有數字顯示，消防處二百五十二架白車平均車齡高達八年，近一半車齡更超過十年，而規定嘅換車期限係七年。香港堂堂一個國際都會，「老爺」白車、甚至甩皮甩骨嘅「侏羅紀」白車通街走，你話羞唔羞家吖？

當局尋日回應話，有三十五架新白車已投入運作，仲有三十五架年中付運到港，其餘一百四十七架明年年底前分批到港，到時白車平均車齡會減至一年半多啲。唉！出咗咁多鑊瘀嘢，而且仲搞出咁多人命，當局先至話換新車，仲有冇再遲啲吖！

叮！白車服務達唔到公眾期望唔係一日兩日嘞。早排立法會帳目委員會嘅報告就踢爆，政府長期唔正視資源不足無法更換新車嘅問題，消防處居然係唯一允許翻新舊車嘅紀律部隊，最離譜係當局竟然喺○六年否決咗消防處更換救護車嘅部分要求。

唔單止唔買新車，消防處緊急救護服務十二分鐘嘅目標召達時間，十年嚟都冇檢討過。有議員批評，消防處採用第三代通訊系統之後，傳召時間已經縮短到一分半鐘，但整體召達時間未有改善，甚至唔達標，係因為白車老化增加咗行車時間。呢頭住荷包唔換車，嗰頭又嗌改善服務，呃鬼咩！

最令人反感嘅係，當局居然惡人先告狀，明明係資源投放不足導致服務質素下降，但佢哋賴得就賴，成日話市民「濫用」白車。點樣叫做濫用吖？唔通真係要不省人事，或者斷手斷腳周身血，至可以Call白車？

再講，公帑取之於民、用之於民，天公地道，白車老化，政府就應該增撥資源更換，保障救護服務，滿足市民需求。咁總好過無厘頭一年嘥幾千萬，請埋班無所事事嘅副局長同政治助理吖。呢條數，有腦嘅都識計啦。叮！