新界王劉皇發做咗行政會議成員後，官方身份令佢從政議政唔再好似以前咁自由。尋日立法會財委會討論屯門興建焚化爐撥款案，同屬建制派的石禮謙竟然喺發言時燒埋發叔，事緣大舊石向環境局局長邱騰華開火時，叫佢唔使成日多謝發叔，因為發叔係行會成員，梗係幫政府啦！
大舊石嘅言論極富挑釁性，老練嘅發叔都忍唔住還拖，話自己雖然係行會成員，但一向以事論事，大舊石嘅言論係對佢嘅一種侮辱。發叔講得咁嚴重，搞到議事廳嘅氣氛都凝重起嚟，點知佢話鋒一轉，話自己唔會同大舊石計較，因為佢哋仍係好朋友喎。
發叔點撥之間既為自己解窘，又免咗尷尬，連大舊石都喺事後發言，話自己冇唔尊重發叔嘅意思，大家卒之以和為貴收場。不過，大舊石喺辯論中將發叔擺上台，可算勇字行頭，好彩發叔唔同佢計較啫。