林超英四月卸任天文台台長後，最近忙於搬屋，尋日佢為一個環保企業頒獎禮做頒獎嘉賓時，就透露最近翻箱倒籠下，先知道自己有張坐咗三十二年嘅梳化，佢凡事都要環保，見張梳化仲用得，一於唔好嘥，將張三十二年嘅古董梳化繼續搬去新居「服役」，黑英見我哋咁詫異，自嘲道：「你話我老婆幾慘呢，有個咁嘅老公！」
計我話，佢太太不知幾高興，事關老公咁長情，對張梳化都三十二年情不變，對人一定更好啦！只係三十二年嘅古董襯唔襯到間新居㗎﹖黑英冇解釋，但佢乜都講環保，又擔心地球暖化加速，睇怕呢張古董梳化四十年唔爛，佢都未必換。
講完搬屋之後，黑英透露，嚟緊將會離港兩個禮拜，同朋友去有「小印度」之稱嘅巴基斯坦北部，重訪唐三藏取西經之路。呢個旅程佢計劃咗好耐，退休前已經聽佢提過，家吓終於出發喇。不過，退休後以為佢會多啲時間陪太太啦，點知轉過頭又揼低太太，同朋友去旅行，睇怕林太嬲呢樣多啲喎！