暑期將至，大學畢業生、在校生都開始搵工，會計界搞咗個「會計專業發展基金有限公司」，主席係立法會會計界代表陳茂波（Paul）。據講，阿Paul個人掏腰包掟咗十萬蚊入基金，呢個基金主要係協助會計業，頭炮就係幫會計學生搵定暑期實習機會，初步已有五十個職位。
除阿Paul牽頭外，個會仲有副主席、資深會計師林智遠，阿Paul話，將來會由佢同副主席聯手撲水，期望個基金可持續發展。今次阿Paul要自己科水先，佢話係因為金融海嘯作怪，佢哋四圍揼人心口都冇用，講時佢都好似有啲肉赤咁。
佢哋已經同香港華人會計師公會合作，搵咗二十六間會計師樓提供五十個暑期實習職位，歡迎大一至大三嘅同學申請，阿Paul話呢五十個位主要嚟自中小型會計師樓，學生可以有唔少實戰機會，實習人工由各會計師樓自己訂，總之算係良心僱主價，好似阿Paul就出五千蚊。