昂坪360行政總裁張少華下個月就會返港鐵，出任車務營運總管，較佢當年離開港鐵時嘅地鐵車廂經理高咗好多級。不過，張少華尋日出席一個活動時，就唔認自己返娘家係「升級」，仲話︰「唔係升職，係公司定期調職啫。」問佢有乜嘢職場秘技時，佢就話行事秉持「行圓志方」四個字。
呢四個字到底點解呢﹖張少華話，所謂「行圓」就係處事要周詳，因應環境執行策略；而「志方」就係做乜都要先訂立目標，就算要因應環境變化作出修訂，目標都唔會改變。講白啲，即係目標要清晰不變，行事要周詳變通。張少華喺360墮車廂後，空降纜車公司執手尾，短短時間搞掂場災難，睇嚟就係靠呢四個字，難怪佢尋日話最難忘纜車重開嘅時刻。
講番個活動，原來尋日係「二○○九世界環境日」，張少華同班義工去咗清潔東涌嘅紅樹林，佢講笑話唔少乘客同佢講，搭纜車經過紅樹林時見到小白鷺，其實啲「小白鷺」係發泡膠箱，佢依家就要將呢啲「小白鷺」搬去屬於佢哋嘅地方。不過，尋日嘅活動，唔止要搬走「小白鷺」，仲要同其他人合力搬走埋一個成個人咁高嘅大車胎。